Երբ ավարտում ենք մարտկոցների տեղադրման աշխատանքները, հարց է առաջանում՝ ինչպե՞ ս թաքցնել դրանք, որպեսզի ինտերիերը լինի անթերի։
Գոյություն ունեն ջեռուցման մարտկոցները թաքցնելու բազմաթիվ տարբերակներ, որոնցից ամենահետաքրքիրներին կանդրադառնանք մեր այսօրվա հոդվածում։
Կախովի էկրաններ
Սա ամենատարածված տարբերակներից մեկն է, որը տեղադրելու համար մեծ ջանքեր չեն պահանջվում, իսկ ջերմափոխանակությունը չի տուժում։ Այն կարելի է պատրաստել նաև կոր անկյուններով, ինչը թույլ կտա զերծ մնալ վնասվածքներից։
Ապակե էկրաններ
Սրանք ոճային հետաքրքիր լուծումներ են հատկապես նրանց համար, ովքեր նախընտրում են մինիմալիզմն ու ժամանակակից դիզայնը։ Ապակե էկրաններն ամրացվում են պտուտակներով և հիանալի ներդաշնակություն են ստեղծում ցանկացած ոճի ինտերիերում։
Տուփ-էկրաններ
Գոյություն ունեն նաև մարտկոցների համար նախատեսված տուփեր, որոնք հնարավորություն են տալիս ամբողջովին թաքցնել դրանք, իսկ տուփերը դառնում են ինտերիերի մի մասը։
Փայտե տուփեր
Փայտը ոչ միայն հարմարավետություն, այլև ջերմություն է ստեղծում բնակարանում։ Սա նրանց համար է, ովքեր ուզում են բնակարանը հարդարել էկո ոճով՝ օգտագործելով բնական նյութեր։ Փայտե տուփերը կարելի է օգտագործել որպես դեկորների համար նախատեսված պատվանդաններ։
Գիպսոկարտոնե տուփեր
Գիպսոկարտոնը համարվում է էկոլոգիապես մաքուր նյութ և հրդեհավտանգ չէ։
Գիպսոկարտոնե տուփեր կարելի է պատրաստել ցանկացած դիզայնով ու թաքցնել ոչ միայն մարտկոցներն, այլև խողովակները։ Նշենք, սակայն, որ գիպսոկարտոնը «վախենում է» արտաքին ազդեցություններից և վնասվելու դեպքում այն նորով փոխարինելու անհրաժեշտություն է առաջանում։
Ինչ վերաբերում է խողովակներին, ապա դրանք կարելի է թաքցնել շրիշակների տակ։
Հիշեք՝ մարտկոցները թաքցնելու արդյունքում ունենում ենք գեղեցիկ ու ներդաշնակ ինտերիեր, բայց որոշ դեպքերում լինում է նաև ջերմության կորուստ։