Երբևէ պատկերացրե՞լ եք, որ պատերը կարելի է հարդարել նաև լամինատով։ Առաջարկում ենք ծանոթանալ մի քանի հետաքրքիր լուծումների, որոնք կկոտրեն այն կարծրատիպը, թե լամինատը նախատեսված է միայն հատակի համար։
Լամինատի շնորհիվ կարելի է ստանալ բնական ինտերիեր, ստեղծել հարմարավետ գոտի՝ ընդգծելով պատերից մեկը կամ մի քանիսը։
Ընտրում ենք լամինատ պատերի համար
Եթե հատակի համար լամինատ ընտրելիս մենք առաջնային կարևորությունը տալիս ենք մաշվածակայունությանը, ապա այս դեպքում դա կարևոր չէ։ Այսինքն՝ կարիք չկա ընտրել բարձր կարգի լամինատ, բավական կլինի նաև 21 կարգը։ Լամինատի հաստությունը նույնպես կարող է լինել քիչ՝ 5-7 սմ-ն լիովին բավարար կլինի։
Լամինատը հյուրասենյակում
Լամինատը կարելի է կիրառել և՛ մեկ պատի, և՛ ողջ հյուրասենյակի հարդարման համար՝ տեղադրելով ինչպես ուղղահայաց, այնպես էլ հորիզոնական ուղղությամբ։ Դրա շնորհիվ կարելի է առանձնացնել հեռուստացույցի ու բազմոցի գոտին։ Եթե հյուրասենյակում կա բուխարի, ապա կարելի է այդ հատվածը հարդարել լամինատով՝ստեղծելով ջերմություն ու հարմարավետություն։
Լամինատը խոհանոցում
Առավել հաճախ լամինատը խոհանոցում կիրառվում է «խոհանոցային գոգոնց»-ի հատվածում։ Այս դեպքում պետք է ստեղծել կահույքի ու լամինատի ճիշտ համադրություն։ Չպետք է մոռանալ նաև խոնավակայունության մասին, որը շատ կարևոր է խոհանոցի պատերի հարդարման համար։
Հետաքրքիր լուծում է նաև լամինատի կիրառումը ճաշասեղանի հատվածում։
Լամինատը ննջասենյակում
Վերջին ժամանակներում դիզայներները շատ հաճախ են ննջասենյակի պատերը հարդարելիս կիրառում լամինատը։ Սակայն որպեսզի ննջասենյակը պահպանի իր դերը, պետք չէ պատերը ծանրաբեռնել՝ ամբողջությամբ լամինատ տեղադրելով։
Լամինատը կիրառվում է հատկապես մահճակալի ետևի պատի հարդարման ժամանակ։ Սակայն պետք է հնարավորինս ճիշտ ընտրել գույնն ու նախշերը՝ համապատասխանեցնելով կահույքին։
Տեսնո՞ւմ եք, թե որքան յուրահատուկ կարող է լինել ինտերիերը լամինատի շնորհիվ։ Մի մոռացեք նաև լամինատի առանձնահատկությունների մասին, որոնք են՝ արագ տեղադրումը, հեշտ խնամքը, գույների ու նախշերի բազմազանությունը, ինչը ցանկացած ոճի ինտերիերի համար ընտրության մեծ հնարավորություն է տալիս։