Բոլոր ծնողների երազանքը երեխաներին լավ ու հարմարավետ պայմաններում մեծացնելն է։ Սակայն նախքան սենյակի նախապատրաստումը պետք է հաշվի առնել գունային երանգների ճիշտ ընտրությունը, ինչից էլ կախված կլինի երեխայի տրամադրությունը, ֆիզիկական առողջությունը, հոգեբանական զարգացումը։
Ի՞նչ գույներ ընտրել մանկական սենյակի համար։
Գույներն ընտրելիս պետք է հաշվի առնել երեխայի սեռը, տարիքը, նախընտրությունները։
Դե ինչ, եկեք պարզենք գույների առանձնահատկությունները։
Սպիտակ
Լուսավոր սենյակը դրական ազդեցություն է ունենում երեխայի տրամադրության վրա։ Սա չի նշանակում, որ ամբողջ սենյակը պետք է հարդարել հենց այս գույնով, քանի որ չափազանց միապաղաղությունը կարող է ճնշել երեխայի ոգևորությունը։ Այդ իսկ պատճառով նախընտրելի են կաթնագույն, կրեմագույն և բեժ երանգները։
Կարմիր
Այս գույնը նպաստում է ուղեղի ակտիվությանը, լավացնում է ուղեղի գործունեությունը, բարձրացնում է տրամադրությունը։ Բայց մի մոռացեք, որ այդ սենյակում երեխան պետք է նաև հանգստանա, ուստի կարմիր գույնն օգտագործեք չափավոր։
Ի դեպ, կարմիր վարագույրը կամ դեկորները կարող են խաթարել երեխայի քունը։ Կարմիրը կարելի է օգտագործել փոքր դեկորների տեսքով՝ ծաղկաման, լուսամփոփ և այլն։
Նարնջագույն
Ի տարբերություն կարմիրի՝ այս գույնն այնքան էլ ագրեսիվ չէ։ Այն մղում է ստեղծագործելու, նաև բարձրացնում ինքնագնահատականը։ Մասնագետների կարծիքով նարնջագույնն ունակ է նաև լավացնելու ախորժակն ու բարձրացնելու տրամադրությունը։
Չնայած այս առավելություններին՝ մանկական սենյակը խորհուրդ չի տրվում ծանրաբեռնել այս գույնով։ Կարելի է շեշտը դնել միայն մեկ պատի վրա։
Երկնագույն
Թվում է, թե երկնագույնը լավագույն ընտրությունն է տղա երեխայի սենյակի համար։ Ճիշտ է, մի կողմից օգնում է հանգստանալ, սակայն մյուս կողմից՝ խանգարում ուշադրության կենտրոնացմանը։ Պատահական չէ, որ այս գույնով հարդարված սենյակում մեզ զգում ենք ամպերի մեջ։ Հարդարելիս երկնագույնը հարկավոր է օգտագործել միայն հանգստի անկյունում։
Կանաչ
Այս գույնը կենդանի բնության խորհրդանիշն է։ Պատահական չէ, որ ունի հանգստացնող նշանակություն։ Կանաչի բոլոր երանգները դրական են ներգործում ակտիվ երեխաների վրա։ Բայց եթե երեխան բնույթով հանգիստ ու խաղաղ է, ապա կանաչի կիրառումը կարող է բացասաբար անդրադառնալ։ Գունային հավասարակշռություն կարելի է ստեղծել կանաչի և այլ գույների համադրությամբ։
Մանուշակագույն
Սա հոգեբանների համար ամենավիճելի գույներից մեկն է։ Մի մասն այն համարում է ստեղծագործ մարդկանց հատուկ գույն, իսկ մյուս մասը կարծում է, որ մանուշակագույնը մարդուն կտրում իրականությունից՝ տանելով երևակայական աշխարհ։
Նախընտրելի է այս գույնը կիրառել ոչ թե ամբողջ սենյակի, այլ պատերից մեկի հարդարման համար։
Դե ինչ, արդեն գիտեք, թե գույներից որն ինչ նշանակություն ունի։ Ի դեպ, մանկական սենյակը նախընտրելի է հարդարել էկոլոգիապես մաքուր ներկերով, որոնք կարելի է գտնել մեր խանութ-սրահներում։